Bronce para Galicia na proba de remudas do Campionato de España de Btt





O equipo de Galicia logrou a medalla de bronce na proba de remudas da primeira xornada do Campionato de España que se disputa na localidade madrileña de Moralzarzal. O conxunto de Cataluña fixo honra á súa condición de favorito para alzarse co seu 14º título da modalidade mentres a Comunidade Valenciana era subcampioa.

Na proba de Team Relay coa que se abriu o programa do campionato, a primeira tanda para os galegos correu a cargo de Samuel González. O ciclista vigués puido situarse co grupo de cabeza completando unha primeira posta na que o dominio se foi alternando cos representantes de Cataluña e Navarra. No tramo final, os membros de Valencia e Madrid lograban dar caza á cabeza e Samuel entregaba o testigo con todo por decidir.

Foi o macedano Carlos Canal quen realizou a remuda máis rápida do combinado galego, unha volta espectacular que lle valeu a Galicia para situarse na cabeza da proba. O junior iniciaba a súa posta na quinta praza e deixábaa preparada para a defensa de Lara Lois chegando a meta por diante Cataluña que rodaba a cinco segundos.

Con tan mínima diferencia Magda Durán (Cataluña) volveu a conquistar a cabeza de carreira para o seu equipo. Nesta terceira remuda houbo que agardar ao final no que o navarro Oteiza pasaba a Cataluña e Galicia situando ao equipo da comunidade foral na primeira praza provisional. Lara Lois cumpría cunha excelente actuación defendendo os postos de medalla a falta da entrada en xogo de Saúl López, último participante do equipo galego.

Naquel momento intuíase que Cataluña encarrilaba o podio e incluso o título ao contar co campión de Europa junior 2017, Jofre Cullell como último competidor e todo facía indicar que a loita se centraría polas outras dúas prazas do podio. As expectativas dos cataláns víronse confirmadas coa gran volta final do seu representante que non deu opción á sorpresa.

Tamén a Comunidade Valenciana, coa última substitución a cargo de Iván Díaz soubo manter a distancia fronte o empuxe do campión de Galicia elite, Saúl López, para facerse co subcampeonato. O monfortino defendía con relativa tranquilidad a terceira praza ante o duelo que mantiñan Andalucia e Madrid por chegar canda él. Así, os galegos voltaban ao podio por equipos trala súa ausencia en 2017.