O galego Carlos Canal representará a España nos Xogos da Xuventude





O ciclista galego Carlos Canal formará parte da selección española nos Xogos Olímpicos da Mocidade que se celebran na cidade arxentina de Bos Aires entre o 8 e o 16 de outubro. O corredor da Escola José Antonio Hermida de Maceda, entrará en competición entre os días 13 e 17 xunto co murciano David Domingo. Ambos disputarán unha proba combinada por equipos de estrada e montaña. Na estrada terán que realizar unha carreira en ruta, un critérium e unha proba contrarreloxo por equipos. O escenario será o Parque Verde (Bosques de Palermo). Ademais, terán que enfrontarse a dous tipos de probas de ciclismo de montaña: Eliminator ( XCE) e Short Track ( XCC).

Do mesmo xeito que os de verán e inverno, os Xogos Olímpicos da Mocidade celébranse cada catro anos baixo a organización do COI e esta será a súa terceira edición. Ademais da capital arxentina, a competición distribúese polas localidades bonaerenses de Bela Vista (en San Miguel), Hurlingham, San Isidro, Vicente López e Vila Martelli.

Ao longo dos trece días que durarán os Xogos, haberá competición en 33 disciplinas (286 actividades deportivas), con 3998 deportistas de categoría xuvenil (de 15 a 18 anos) chegados de 206 países na procura dalgunha das 1250 medallas en xogo.

Toda a actualidade sobre a actuación do combinado nacional pode seguirse a través do hashtag # TeamESPCiclismo ou na web dos Xogos www.buenosaires2018.com