O XCO galego festexa o 25 de xullo co seu campionato en Ares





Douscentos bikers celebrarán este xoves a festividade do 25 de xullo pugnando polos maillots de campións galegos de cross country olímpico (XCO). Montefaro, no concello coruñés de Ares, será o escenario desta cita que chega días despois do Campionato de España disputado en Navarra e onde a Selección de Galicia acadou tres medallas, entre elas, o ouro na proba Team Relay. No colofón da temporada o XCO galego ten motivos para festexar. 

O mosteiro de Santa Catalina acolleu este martes a presentación oficial do evento organizado polo club Pulpeiros Mugardos. Este acto contou coa presenza de Noelia Montero, concelleira de Deportes de Ares; Juan Carlos Muñiz, presidente da Federación Galega de Ciclismo; Ramón Montero e Alfonso Tajuelo, presidente e tesoureiro do Pulpeiros Mugardos; e de Lucas Grandal, corredor do Esmelle. 

O programa de carreiras porase en marcha o xoves ás 11:00 horas coa primeira quenda de saídas. O segundo turno arrancará ás 12:30 coas categorías elite e sub23, feminina e masculina, como pratos fortes. O circuíto de Montefaro ten unha lonxitude de 5 quilómetros. 

Tres dos catro integrantes do conxunto Team Relay que o pasado venres conquistou a medalla de ouro por autonomías estarán en Ares. A única ausencia será a do júnior Carlos Canal, convocado pola selección estatal para participar esta fin de semana no Europeo XCO/XCE/TR na República Checa. 

O Campionato de Galicia XCO pon o punto final a un intenso calendario autonómico. Na competición máis agardada da temporada o ano pasado triunfaron Laura Capa e Jorge Fernández en cadetes, Andrea García e Carlos Canal en juniors, Irene Trabazo e Samuel González en sub23, Lara Lois e Saúl López en elites, Isabel Castro nas masters, Manuel Ángel Parada nos máster-30, Alejandro Trasbach nos máster-40 e Manuel Castro nos máster-50.