Probas Deportivas

A fin de semana de ciclocrós en Pontevedra ábrese con Paula Díaz e Saúl López triunfando na Copa Galicia





Co IV Ciclocrós Concello de Pontevedra deu inicio este sábado a fin de semana de bicicletas e barro na cidade do Lérez. A elite asturiana Paula Díaz (Río Miera) e o elite monfortino Saúl López (Maceda) foron os grandes triunfadores na sétima xornada puntuable da Copa Galicia, unha cita que serviu de antesala para a proba da Copa de España que se celebrará este domingo.


Isabel Castro cólgase en Bélxica a medalla de bronce no Mundial Máster de ciclocrós





Na localidade belga de Mol, na provincia de Amberes, Isabel Castro subiu este venres ao podio do Campionato do Mundo Máster de ciclocrós. A corredora do Condado Bike obtivo a terceira posición na categoría 50-54 anos. Oitava clasificada no 2018 neste mesmo escenario, a actual líder da Copa de España máster-50 exhibiu o gran nivel que leva amosando durante toda a temporada. 


Pontevedra acolle esta fin de semana a Copa Galicia e a Copa de España de Ciclocross





A proba da Copa de España, que terá lugar o domingo 1 de decembro, é puntuable para que Pontevedra chegue a acoller a Copa do Mundo no futuro. Esta foi a principal idea transmitida na presentación de ambas probas esta mañá, que estivo encabezada pola concelleira de Grandes Eventos, Anabel Gulías, e polo concelleiro de Deportes, Tino Fernández, acompañados polo vicerreitor do Campus de Pontevedra, Jorge Soto, e polo presidente da Federación Galega de Ciclismo, Juan Carlos Muñiz.


Pontevedra, proba decisiva na Copa de España de Ciclocrós





A cidade de Pontevedra vivirá este próximo domingo 1 de decembro coa chegada da Copa de España o seu primeiro encontro da tempada cos mellores ciclocrossistas do país, que regresarán a este emprazamento do 11 ao 13 de xaneiro para a celebración do Campionato de España 2020 da especialidade.

O Circuíto da Illa das Esculturas, que xa foi escenario do nacional o pasado ano, ben podería ser o lugar onde coñezamos o nome dos novos vencedores da Copa de España de Ciclocrós da categoría elite.


Póker de vitorias galegas na Copa de España de Alcobendas





Os especialistas galegos de ciclocrós seguen indo a máis na Copa de España e na cuarta xornada puntuable asinaron en Alcobendas a actuación con máis éxitos do curso. Catro vitorias e outros dous postos de podio dúas semanas antes de que o certame estatal desembarque en Pontevedra.


Ana Santos e Daniel López conquistan o Rosal na Copa Galicia de Ciclocrós





Unha das citas clásicas do calendario autonómico volveu facer este sábado as delicias dos especialistas en ciclocrós. Na súa XXII edición o Trofeo Comunidade de Montes de Eiras achegouse aos 400 participantes. Sobre a area do Rosal, o elite Daniel López Parada (Burgos BH) e a júnior Ana Santos conquistaron os triunfos de máis prestixio na sexta xornada da Copa Galicia.


Reunión Técnica de BTT-XCM





Dentro das xornadas técnicas programadas para a valoración da temporada 2019 e programación de cara o 2020, a Federación Galega de Ciclismo convoca a todos os clubes interesados a unha reunión de BTT-XCM que terá lugar o sábado 23 de novembro ás 13:00 horas no Hotel Congreso (Teo).

Ese mesmo día, e tamén no Hotel Congreso, celebraranse as reunións de Estrada (todas as categorías) ás 10:00 horas e Mini BTT ás 17:00.


Tres primeiros postos e un segundo para os galegos na Copa de España de Karrantza





A tres semanas de que a Copa de España chegue a Galicia, os representantes autonómicos acadaron tres triunfos na terceira xornada puntuable do certame estatal. Iván Feijoo (Nesta) e Irene Trabazo remataron primeiros entre os sub-23 e Isabel Castro (Condado Bike) impúxose na carreira máster-40/50. Miguel Rodríguez (Ponteareas), segundo nos juniors, asinou o outro gran resultado da 'armada galega' no XXVII Ciclocross de Karrantza.


Saúl López e Laura Capa exerceron de vakners na Copa Galicia de Dumbría





El era o rival máis temido e ela demostrou a súa voracidade sobre o barro. O elite Saúl López (Maceda) e a júnior Laura Capa (Aleata-Farto) exerceron de vakners, o animal mitolóxico que deu nome á quinta xornada da Copa Galicia de Ciclocrós, este sábado no municipio coruñés de Dumbría.


Presentación do VI Ciclocrós Terras do Vákner en Dumbría





Máis de 300 ciclistas inscribíronse para participar este sábado en Dumbría no VI Ciclocrós Terras do Vákner, quinta xornada puntuable para a Copa Galicia. A presentación deste evento tivo lugar este xoves nas instalación deportivas do Conco, coa presenza de José Manuel Pequeño, alcalde de Dumbría, e Juan Carlos Muñiz, presidente da Federación Galega de Ciclismo.