Seleccións

Os bikers galegos conquistaron dous ouros e unha prata no Campionato de España de XCM





Un dobre título na categoría master-40 A e un segundo posto na clasificación elite feminina foi o balance dos corredores galegos no Campionato de España de cross country maratón (XCM) disputado este sábado na localidade malagueña de Alhaurín de la Torre. Representando á Selección de Galicia, Alejandro Trasbach proclamouse por primeira vez campión estatal e no seu mesmo grupo de idade Teresa Barreira revalidou a coroa obtida o pasado ano. O terceiro metal autonómico acadouno Susana Alonso defendendo as cores do Extremadura-Ecopilas.


Galicia acode cunha selección de garantías ao Campionato de España de XCM





Seis contrastados bikers lucirán os maillots da Selección de Galicia este sábado no Campionato de España de cross country maratón (XCM) que se celebra na localidade malagueña de Alhaurín de la Torre. O combinado autonómico desprázase ata terras andaluzas coa ambición de protagonizar unha actuación similar á do pasado ano, cando sumou catro medallas.


O junior Guillermo García disputará a contrarreloxo e a proba en liña do Mundial coa selección española





Haberá un representante galego no Campionato do Mundo de estrada que se celebrará a vindeira semana en Bergen (Noruega). O junior Guillermo García Janeiro defenderá o maillot da selección española e farao por partida dobre, disputando tanto a contrarreloxo individual como a carreira en liña. 


Pablo Rodríguez, 51º no Mundial XCO de Cairns





Nun Mundial absolutamente desafortunado para España, o suízo Nino Schurter entrou na lenda do BTT ao converterse en Cairns (Australia) no primeiro corredor que se anotou seis Campionatos do Mundo elite de Cross Country Olímpico (XCO), os tres últimos de forma consecutiva. O checo Jaroslav Kulhavy, a 7 segundos, e o tamén suízo Thomas Listscher, a 15", completaron un podio do que estiveron moi lonxe os españois. O ourensán Pablo Rodríguez rematou no posto 51, a 8:47.


Convocatoria da Selección de Galicia para o Campionato de España de XCM





A Selección de Galicia estará representada polos seguintes seis bikers o vindeiro 16 de setembro no Campionato de España de Cross Country Maratón (XCM) que se celebra en Alhaurín de la Torre (Málaga):

Élite masculino: Brandan Márquez Fernández (Gexa / X-Sauce)

Master-30 masculino: Javier Busto Ramos (Extol - La Gramola Team)

Master-30 feminino: Isabel de Picoaga López (7 Voltas)


Pablo Rodríguez, duodécimo en Val di Sole e convocado para o Mundial de Cairns





O macedán Pablo Rodríguez é un dos once bikers citados polo seleccionador español Cristóbal Sánchez para participar no Mundial de Cairns (Australia), entre o 5 e o 10 de setembro.

Esta convocatoria chégalle ao corredor do MMR despois de despedir a Copa do Mundo asinando o duodécimo posto no circuíto italiano de Val di Sole, a mesma posición que ocupou na clasificación xeral final.

"Estou contento co meu rendemento e coa regularidade de todo o ano. Agora toca último empuxón porque en dúas semanas chega o campionato do mundo de Australia", sinalou o ourensán.


Guillermo García estivo a piques de lograr unha nova medalla na proba en liña dos Campionatos de España junior





A Selección de Galicia acariciou o dobrete nos Campionatos de España junior celebrados en Valladolid. Despois da medalla de ouro acadada por Guillermo García na contrarreloxo individual, o pontevedrés optou á vitoria na carreira en liña ata os últimos metros. O ciclista do Bathco xogouse o título ao sprint con outros cinco corredores e ocupou a cuarta praza.


Guillermo García, novo campión de España junior de contrarreloxo





Os Campionatos de España juniors comezaron este sábado con éxito galego en Valladolid. Guillermo García subiu ao máis alto do podio tras impoñerse na contrarreloxo masculina. Ao título acadado polo ciclista pontevedrés hai que sumar a sexta praza obtida por Redosinda Fernández na proba feminina. 

O triunfo de García resultou incontestable. O corredor do Bathco foi o único participante capaza de baixar dos 20 minutos nos 15,8 quilómetros de percorrido. Cun rexistro de 19:50 superou en 27 segundos ao vasco Xabier Azparren e en 32" ao catalán Pau Miquel. 


Trece corredores representarán esta fin de semana á Selección de Galicia nos Campionatos de España juniors en Valladolid





Os títulos estatais en estrada da categoría junior póñense en xogo durante esta fin de semana na provincia de Valladolid. O sábado pola tarde disputaranse na localidade de Serrada as contrarreloxos individuais e o domingo pola mañá será a quenda para as carreiras en liña na capital pucelana.  A Selección de Galicia desprazouse este xoves ata terras vallisoletanas con trece corredores na súa expedición. 


Convocatoria da Selección de Galicia para os Campionatos de España de estrada junior





Na última fin de semana deste mes de agosto, o sábado 26 e o domingo 27, disputaranse en Valladolid os Campionatos de España de estrada junior.

A Selección de Galicia desprazarase ata a capital pucelana o xoves 24 e os corredores convocados para esta cita son:

Categoría masculina

Guillermo García Janeiro (Bathco)

Abel Franco Álvarez (Bathco)

Brais García Romero (Cambre - Renault Caeiro)

Jorge Fernández Suárez (Cidade de Lugo - Esturión)

Jesús Rodríguez Pociña  (Cidade de Lugo - Esturión)